समाचार विश्लेषण

संवैधानिक संकटको शुरुवात

- अजयदीप शर्मा

अनिश्चिताको केन्द्रमा रहेको मुलुकको राजनीतिक अवस्था अझै पनि अन्यौलताबाट अगाडि बढ्ने संकेत देखिएको छैन । संसदको विशेष अधिवेशनबाट बहुमतले पारित गणतन्त्रको घोषणा र पूर्ण समानुपातिक निर्वाचन प्रणाली कार्यान्वयनको पक्षमा कांग्रेस सहमत हुन नसक्दा देशमा संवैधानिक संकट बढ्दै जान थालेको छ ।

सहमति जुटाउनकै लागि केही दिनदेखि नेकपा माओवादी, काँगे्रस र एमालेबीच द्विपक्षीय र त्रिपक्षीय छलफलहरु चलिरहेको भए पनि हिजोसम्म पनि कुनै निष्कर्ष निस्कन सकेन । आज हुने संसदको बैठकमा सहमतिकै लागि छलफल हुने बताइएको छ । संसदको सर्वोच्चतालाई सबैभन्दा प्रजातान्त्रिक विधि मान्दै आएको नेपाली काँगे्रसले अहिले आएर संवैधानिक प्रक्रियालाई नै लत्याएर निकासको हलो अड्काइरहेको अन्य राजनीतिक दलहरुले बताएका छन् । सहमतिका लागि आफूहरुबाट अत्यधिक प्रयासहरु भइरहेको भए पनि काँगे्रस अनेक बहानामा परिस्थितिलाई यथास्थितिमै राख्न खोजिरहेकोले सहमति जुट्न गाह्रो भएको माओवादीका केन्द्रीय सदस्य विप्लवले बताउनुभएको छ ।

देशमा संवैधानिक संकटको शुरुवात काँगे्रसले गरिसकेको भन्दै माओवादी नेता विप्लवले भारत र काँगे्रसबीचको समिकरण बढ्दै गइरहेको बताउनु भएको छ । सेना समायोजनको विषयमा छलफल गर्न रुक्माङ्गत कटुवाल भारत जान लागेको खुलासा गर्दै नेता विप्लवले भन्नुभयो- 'भारतले अहिले खुल्लारुपले नेपालमाथि हस्तक्षेप बढाउँदै लगेको छ ।' मुलुक अब यहि संक्रमणभित्र धेरै रहिरहन नसक्ने भएकाले आफनो पाटीले राष्ट्रवादी र जनवादी मोर्चा कायम गदै आन्दोलन र आमविद्रोहको तयारी गर्न थालेको कुरा विप्लवले बताउनु भएको छ ।