जस्ताको तस्तै

सर्कार सबै आयो

- गाउँले यात्री

आयो, आयो, लौ आयो ताजा खबर ! 'लोकतन्त्र आयो'.. 'राजाले घुडा टेके'... लौ आयो हजुर ताजा खबर .. एकाविहानै पत्रिका बेच्ने केटो चिच्याउँदै हिडिरहेथ्यो सडकमा । आज जनआन्दोलनको २०औं दिन अर्थात् बैसाख १२ गते । अझैं २/४ दिन यस्तै जनसागर उल्र्यो भने राजतन्त्र त के राजतन्त्रका बाउ बाजे र छोरा नातीको अवशेष पनि बाँकी रहने छैन यस्तै सोच्दै कोठामा बसिरहेको थिए म ।

घाम उदाइसक्यो तर हिजोजस्तै आज सडकमा विरोधका चर्का नाराबाजीसँगै र्‍याली र जुलुसहरु निस्किएनन् । बरु अविर जात्रा जस्तो दृश्य पो देखियो । नभन्दै त्यस्तै रहेछ । एकहुल मान्छे नामक जीवित प्राणीहरु लोकतन्त्र आयो भन्दै खुसी मनाउदै सडकमा कुदिरहेका थिए ।

झण्डै २० महिना अघि मैले यही दृश्य देखेको थिए शहराँ गा'को बेला । जनआन्दोलन अर्थात् जाने आन्दोलनको २०औं दिन अर्थात आउने आन्दोलनको पहिलो दिन बैसाख १२ गते । नेपाली जनताले खोजेको साँचो लोकतन्त्र त ख्वै त्यति थाहा भएन तर सेरेमोनियलप्रसादको लोकतन्त्र भने त्यही दिनदेखि शुरु भयो । त्यतिबेला देखि नै हाम्रो देशाँ शुरु भएको आउने क्रम अझैं जारी छ ।

सबभन्दा पहिले लोकतन्त्र आयो । त्यो पनि विभिन्न साइजमा, कतै बोतलमा, कतै होटलमा, कतै शक्तिमा कतै जुक्तिमा । जेहोस अहिलेसम्म आउँदा लोकतन्त्रको विशालबजार नै खुलिसकेको छ । त्यसपछि के नै आएन र - लोकतन्त्रको साथमा शोकतन्त्र, भोकतन्त्र, जोकतन्त्र, रोगतन्त्र ह्वात्तै आयो । काँग्रेसको एकाधिकार, गिरिजाप्रसाद उर्फ सेरेमोनियलप्रसादको र्सवाधिकार, मधेशभित्र विदेश, तर्राई बाल्ने अमेरिकन आगोदेखि बम पड्काउने बम्बैवाले बारुद पनि भित्रियो । रायमाझी आयोग, बमकाण्ड छानविन आयोग, गौरकाण्ड छानविन आयोग, कपिलवस्तुकाण्ड आयोग के-के आएन र - अन्तरिम सरकारदेखि संविधानसम्म सबै आए । संविधान सभाको चुनाव पनि ३ पटक आयो ।

यतिमात्र कहाँ हो र - १२ बुँदेदेखि अन्तरिम संविधानसम्म, अनमिनदेखि अनमनसम्म, खैरै,कुइरेदेखि धोतिवाल, लोतिलालसम्म सबै आए । हुँदा-हुँदा दक्षिणबाट सिमा मिच्दै,मधेश कुच्दै, कोशी, मेची, गण्डकी र महाकाली लुट्दै धोतीवाल फौज पनि यतै आउदैछ । आखिर लोकतन्त्र भनेकै यस्तै हुन्छ कि क्या हो ?